ឆ្លើយតបទៅនឹងការស្នើពីសំណាក់សម្ដេច តេជោ ហ៊ុន សែន តាមរយៈសារជាសម្លេងពិសេស កាលពីថ្ងៃទី ១២ នេះ រដ្ឋបាលរាជធានីភ្នំពេញបានចេញសេចក្ដីជូនដំណឹង មួយស្ដីពីការរៀបចំរថយន្ដក្រុងចំនួន ១៧៥ គ្រឿង សម្រាប់បម្រើសេវាដឹក ជញ្ជូនសាធារណៈ ដល់ប្រជាពលរដ្ឋក្នុងឱកាសបុណ្យភ្ជុំបិណ្ឌ​ ដោយឥតគិតថ្លៃ ចំនួន ៥ ថ្ងៃ គិតចាប់ពីថ្ងៃទី ២៣ ខែ កញ្ញា ឆ្នាំ ២០២២ ដល់ថ្ងៃទី ២៧ ខែ កញ្ញា ឆ្នាំ ២០២២ នេះ។ 

យោងតាមខ្លឹមសារសេចក្ដីប្រកាសបានឲ្យដឹងថា រដ្ឋបាលរាជធានីបានបែងចែកការធ្វើដំណើរនេះ ជា ២ ផ្នែក ៖ 

ទី ១ ៖ សម្រាប់ប្រជាពលរដ្ឋដែលនៅក្នុងក្រុងភ្នំពេញ  រដ្ឋបាលរាជធានី បានប្រើប្រាស់រថយន្ដចំនួន ៥៥ គ្រឿង 

ទី ២ ៖ សម្រាប់ប្រជាពលរដ្ឋដែលនឹងធ្វើដំណើរទៅតាមខេត្ត ហើយត្រឡប់មករាជធានីភ្នំពេញវិញ រដ្ឋបាលរាជធានី បានរៀបចំរថយន្ដក្រុងចំនួន ១២០ គ្រឿង ដោយចេញដំណើរចាប់ពីម៉ោង ៥:៣០ នាទីព្រឹក។ 

សម្រាប់ទីតាំង ចេញដំណើរ ទៅតាមបណ្ដាខេត្តរដ្ឋបាលរាជធានីបានរៀបចំ ដាក់ទៅគ្រប់តាម​បណ្ដោយផ្លូវជាតិ ដូចជាលើ៖ 

• ផ្លូវជាតិលេខ ១ មាន ២ខ្សែ ពី ភ្នំពេញ-កណ្ដាល-ស្វាយរៀង ៥គ្រឿង, ភ្នំពេញ-កណ្ដាល-ព្រៃវែង​ ៥គ្រឿង, 
• ផ្លូវជាតិលេខ ២ មានមួយខ្សែ ភ្នំពេញ-កណ្ដាល-តាកែវ ៥ គ្រឿង, 
• ផ្លូវជាតិលេខ ៣ មាន ២ខ្សែ ភ្នំពេញ-កែប​ ៥ គ្រឿង, ភ្នំពេញ-កំពត ៥ គ្រឿង, 
• ផ្លូវជាតិលេខ ៤ មាន ២ ខ្សែ ភ្នំពេញ-កំពង់ស្ពឺ ៣ គ្រឿង, ភ្នំពេញ-ព្រះសីហនុ ៧ គ្រឿង, 
• ផ្លូវជាតិលេខ ៥ មាន ៤ខ្សែ  ភ្នំពេញ-កំពង់ឆ្នាំង ៥ គ្រឿង, ភ្នំពេញ-ពោធិ៍សាត់ ១០ គ្រឿង, ភ្នំពេញ-បាត់ដំបង ១៥គ្រឿង, និង ភ្នំពេញ-បន្ទាយមានជ័យ ១៥ គ្រឿង 
• ផ្លូវជាតិលេខ ៦ ភ្នំពេញ-កំពង់ធំ ៥ គ្រឿង, ភ្នំពេញ-សៀមរាប ១៥ គ្រឿង, 
• ផ្លូវជាតិលេខ ៦,៧ ភ្នំពេញ-កំពង់ចាម ៥ គ្រឿង, ភ្នំពេញ-ត្បូងឃ្មុំ ៥គ្រឿង, ភ្នំពេញ-ក្រចេះ ៥ គ្រឿង និងភ្នំពេញ-ស្ទឹងត្រែង ៥ គ្រឿង 

ក្នុងនោះដែរ សម្ដេចតេជោ និងរដ្ឋបាលរាជធានីភ្នំពេញ ក៏បានសុំអំពាវនាវ ដល់ក្រុមហ៊ុន និងម្ចាស់រថយន្ដឈ្នួល ឲ្យរក្សាតម្លៃនៅដដែល កុំដំឡើងថ្លៃក្នុងឱកាសនៃការធ្វើបុណ្យទាន ព្រមទាំង ក្រើនរំឭកដល់ប្រជាពលរដ្ឋឲ្យរក្សាស្មារតីប្រុងប្រយត្ន័ខ្ពស់ ពេលធ្វើដំណើរ ទៅបុណ្យ ដើរលេងកម្សាន្ដ ឬជួបជុំនានា ស្របពេលដែល កូវីដ-១៩ នៅមិនទាន់សាបរលាប ១០០% នៅឡើយ។ 

អត្ថបទ៖ Andra